متن شعر

تەنیا یارەگەم"

تەنیا یارەگەم یەێ چەو ڕەشێگە نازگ نارنجی قسە خوەشێگە خەزاڵ تەرزێگە فەرە نازارە تەرک تازەێگە چۊو گۆڵ وەهارە وێنەێ شەمامە خوەش و خوەش بوە فەرە عەزیزە چۊو دار لیموە دْ چەو ناز دێرێ چۊو چەو ئاهوو بوو زۆڵفانێ مۆشک عەنبەر بوو کرمانج و سوران کەڵهۆڕ و گوران لە شێوەێ نییە لە ناو کرماشان

کەچی سەروێنێ وێنەێ بەرەفتاو چۊو کەپوو ڕێ کەێ هەر وە خاوە خاو هەراسان چۊو کەڵ ڕەمیاێ حەڵقەێ ڕاو خەرامان چۊوسەوڵ زڵف هۊلو پرچ خاو نازگ نەهاڵان مەگەر شێوەێ خوەێ باڵا چۊو ئەر ئەر قامەت وێنەێ نەێ چەو وێنەێ نەرگس باخ ڕزوانی کەڵ دیدە مەس کۊوەێ کۆردانی م شێت و لێوەێ دانەێ خاڵدم خنیەێ ناو قەپاڵ شەۊو واڵدم

زەبونم لە دەس سەلتەو زوونێ شەوان خەێاڵ و ڕوژان لە شونێ مل بەرز پەلنگ شووڕ قوز چوپی کیش تەرکەێ خوەش ئەنام جور چۊزەێ قامیش ڕەنگ ڕۆخسارد گۆڵ نەوروزە خاڵ سەرگووناد وێنەێ پیروزە لەبە شیرینی خوەشەو کەی زامان لە خاڵد هەێ ڕوو لە چەود ئامان تیر بژانگێ ئاسن سمنێ سەوڵ ئەڕاێ باڵاێ کڕنوش کەێ نمێ

شێعر:کەیومەرس ئەمیری(لەک ئەمیر)و ئەکبەر ڕزایی کەڵهۆڕ